Немањето репрезентациска титула го мачи Лео Меси целата негова кариера, но сега има нова шанса конечно да го скрши проклетството.
Двајцата најдобри фудбалери во новиот милениум, Кристијано Роналдо и Лионел Меси, имаа една голема мака: сите успеси им беа на клупски план, а со репрезентациите никако да стигнат до пехар. Роналдо тоа проклетство го скрши во 2016 кога Португалија триумфираше на Европското првенство, а потоа стана и прв освојувач на Лигата на нации, иако ова натпреварување и нема некоја тежина.
Меси само што наполни 34 години, но и натаму го мачи тој успех со Аргентина, успех кој никако да дојде. Црната дамка во кариерата на аргентинскиот виртуоз се четирите загубени финалиња со „Албиселесте“: 3 во Копа Америка и 1 Мундијал.
Црната серија на Меси почна во Венецуела во 2007 година кога во финалето на Копа Америка Аргентина играше против Бразил и загуби со убедливи 3:0 иако важеше за голем фаворит бидејќи „Кариоките“ беа со комбиниран тим без тогаш најдобрите Роналдињо, Кака и Роналдо, а Меси со Ернан Креспо, Пабло Аимар, Хуан Роман Рикелме и Карлос Тевес.
Наредното финале стигна после цели 7 години, односно на Мундијалот 2014 во Бразил каде Германија со минимални, но доволни 1:0 на продолженија го победи тимот на Меси.
Потоа и во наредните две години следуваа две разочарувања, уште поневеројатни од претходните. Во 2015 Аргентинците на Копа Америка загубија на пенали од домаќинот Чиле за ново разочарување за Меси.
Наредната 2016, на она јубилејно вонредно издание кога се славеа 100 години Копа Америка и тоа во САД, повторно истите репрезентации го репризираа финалето во буквална смисла: 0:0 по 120 минути игра и пенал-рулет. Меси дури и промаши пенал, а Аргентина повторно загуби. Во изданието во 2019 заглавија во полуфиналето откако Бразил ги елиминираше.
Сега, Аргентина и Меси се пред своето петто заедничко финале, четврто на континенталното натпреварување. Домаќин е Бразил и тоа на „Маракана“ во Рио, и најверојатно без гледачи. Без разлика на сѐ, Меси е пред голем предизвик бидејќи без репрезентациска титула ниту еден фудбалер не може да биде меѓу најдобрите на сите времиња. Несомнен е талентот на Меси, и сите негови достигнувања со Барселона, сите голови и асистенции, но без титула со Аргентина ќе биде како оние виртуози кои имале само клупски успеси како легендарните Ференц Пушкаш, Еузебио, Џорџ Бест и плејада други.
Еден фудбалер, колку е да е добар, колку и да е вонсериски играч, на крајот го дефинираат освоените титули. Но, потешките титули се оние со своите репрезентации, а такви Меси има нула и тука е проблемот.
„Ја исполнивме првичната цел, а таа беше да играме во финале. Имам поголема надеж од било кога бидејќи сме во ново финале. Отсекогаш сум велел дека да освојам титула со мојата репрезентација ми е најголемата желба“, вели Меси во пресрет на финалето.
Но, за таа титула се прашува и Бразил. Бразил кој последните две финалиња против Аргентина ги има добиено (2007 и 2005), а загубил во 1991 кога се играла финална група, иако во меѓусебниот натпревар Аргентина победила.
Меси својата нова шанса, можеби последна во кариерата, ќе ја има ноќта помеѓу сабота и недела со почеток од 2 часот по македонско време, односно 21 по локално. А, правдата ќе ја дели уругвајскиот судија Естебан Остохич.
