Собата во која Лионел Меси престојуваше на Универзитетот во Катар за време на Светското првенство ќе стане мал музеј, објавија локалните медиуми.
На овој начин ќе биде овековечен моментот кога прекрасниот Аргентинец се искачи на светскиот трон и го „зацементира“ статусот најдобар играч на сите времиња.
Меси и неговите соиграчи одлучија да не престојуваат во луксузен хотел со 5 ѕвезди за време на Мундијалот во Катар, а наместо тоа отседнаа во студентски дом, за да можат да уживаат во традиционалната скара.
Изненадувачката одлука да останат таму дојде откако фудбалските власти на Аргентина одлучија дека распространетиот кампус ќе им овозможи да организираат асадо - традиционално собирање на скара, што е едно од кулинарските задоволства на оваа јужноамериканска земја, кое го дели со Уругвај, Парагвај и Чиле.
Делот од кампусот на Универзитетот во Катар каде беше сместен аргентинскиот тим се состои од 90 соби, содржи најсовремени спортски објекти, олимписки базен и сопствен фудбалски стадион со капацитет од 10.000 седишта.
На крајот одлуката беше повеќе од добра, бидејќи „Албиселесте“ ја освоија титулата светски шампион и направија одлична атмосфера, а во чест на најдобриот фудбалер на сите времиња, Лео Меси, неговата соба ќе биде претворена во мал музеј.
