Социјалните мрежи отсекогаш биле на удар со обвиненија дека тие нѐ прават асоцијални и помалку друштвени, па некои дури и ги обвинуваат дека тие го одземаат времето кое луѓето треба да го посветат на пријателите и роднините.
Сепак, новото истражување го урива овој мит, тврдејќи дека не постои ниту еден доказ кој покажува дека социјалните мрежи го попречуваат дружењето со луѓе во вистинскиот живот.
Истражувачи од Универзитетот од Канзас направија две истражувања со кои покажаа дека, спротивно на популарните тврдења, корисниците на социјални мрежи не претрпуваат никакви друштвени одвојувања откако ќе поминат поголем временски период на некоја од социјалните платформи.
„Ние не тврдиме дека прекумерното користење на социјални мрежи е добро, туку едноставно не е толку лошо колку што одредени луѓе тврдат дека е“, рече Џефри Хол, ко-автор на истражувањето.
Во првото истражување, спроведено пред неколку години, истражувачите земаа податоци за луѓето кои користат социјални мрежи поголем дел од денот и ги споредуваа со нивните човечки односи во вистинскиот живот за да дознаат како едното влијаело на другото.
Другото истражување испитуваше 116 волонтери, од кои половината беа студенти, а другата половина беа луѓе во нивните 40-ти, кои постојано користат социјални мрежи и потоа тие беа прашувани за нивните секојдневни друштвени активности.
И двата дела од истражувањето покажаа дека користењето на социјални мрежи нема никакво влијание на социјалните активности, и тие на никој начин не ѝ пречат на ниедна индивидуа која сака да биде дел од друштвена група.
