Шпионски софтвер развиен во Израел се користел за успешно хакирање на 37 смартфони ширум светот кои им припаѓале на новинари, владини претставници и активисти на организации за човекови права, според заклучокот од истрагата спроведена од 17 медиумски организации.
Една од тие организации, Washington Post, тврди дека шпионскиот софтвер наречен Pegasus, создаден од безбедносната организација НСО Group, бил користен, меѓу другото, за прислушување телефони на две жени кои биле блиски со Џамал Кашоги, колумнистот на Washington Post кој беше убиен во 2018 година во конзулатот на Саудиска Арабија во Турција, пренесува Reuters.
Лондонски Guardian исто така посочува дека истрагата покажала дека шпионскиот софтвер постојано и често се злоупотребувал дозволувајќи да се извлекуваат СМС пораки, фотографии и е-пошта, тајно да се снимаат повици и да се активираат микрофони на уредите на корисниците.
Заклучоците од истрагата, кои не беа независно потврдени од Reuters, не наведуваат кој и зошто го користел овој шпионски софтвер, но израелската компанија рече дека тој е развиен за владините разузнавачки структури и безбедносните агенции кои се борат против тероризмот и криминалот.
Израелската компанија на својата веб-страница ги негира обвинувањата од истрагата за 17 медиумски куќи предводени од непрофитната организација „Забранети приказни“, со седиште во Париз.
„Извештајот на организацијата Забранети приказни е полн со погрешни претпоставки, неосновани теории и предизвикува сериозни сомневања за веродостојноста и интересите на изворите. Сè укажува на тоа дека ‘неидентификувани извори’ доставиле неосновани информации шо немаат допир со реалноста“, соопшти израелската компанија.
Групацијата НСО соопшти дека нејзината технологија во никој случај не може да биде поврзана со убиството на новинарот Кашоги, но портпаролот на компанијата не беше достапен за да обезбеди дополнителни информации за Reuters вчера.
Амнести Интернешнл го осуди „сериозниот недостаток на законска регулатива“ во областа на софтверот за шпионски (безбедносен) систем.
Во објавата на Washington Post се вели дека повеќе од илјада луѓе од 50 земји биле шпионирани, вклучително и членови на неколку арапски кралски семејства, најмалку 65 истакнати бизнисмени, 85 активисти за човекови права, 189 новинари и повеќе од 600 политичари и владини претставници, меѓу кои и шефови на држави и премиери.