Предводникот на Манчестер Јунајтед беше полн со пофалби по вчерашниот неверојатен пресврт против Аталанта, особено кон својот најскап фудбалер.
„Црвените ѓаволи“ синоќа на полувреме имаа негатива од 0:2, но со фуриозна и одлучна игра во вторите 45 минути успеаја да направат целосен пресврт и да победат со 3:2. Стрелец на последниот, трет и победнички гол беше кој друг ако не - Кристијано Роналдо.
Токму Португалецот изминатиов период беше цел на критики со обвинение дека не придонесува во играта и во дефанзивните задачи, односно дека не се труди доволно.
„Кристијано беше одличен пред голот. Ако некој сака да го критикува за неговиот труд и придонес, само нека го изгледа натпреварот. Погледнете како трча наоколу“, вели презадоволниот Оле Гунар Солскјер.
„Навистина сум многу задоволен од тоа како тој го предводеше нападот. Трчаше надолу, се пробиваше, вршеше пресинг, со таква игра сакаме да ја придобиеме публиката“, додаде.
„На крајот беше внатре во нашиот шестнаесетник, го видовте како спринтира, тој направи сѐ што еден центарфор треба да прави. А постигнувањето голови е она што тој го прави најдобро од сите“.
Роналдо летово се врати на „Олд Трафорд“ откако во 2009 година си замина одејќи во Реал Мадрид, каде што играше и досега. Сезонава има постигнато 6 гола на 8 натпревари, а 3 од нив се во неговото омилено натпреварување - Лигата на шампиони.
