Почетокот на кариерата на Оле Гунар Солскјер започна како сон, но тешките натпревари допрва доаѓаат. По првиот пораз во неговиот мандат, оној од ПСЖ во ЛШ, тој реши да го повика стариот тутор сер Алекс Фергусон за да го мотивира составот во пресрет на мечот против големиот ривал Ливерпул.
„Црвените ѓаволи“ се наоѓаат во пеколно добра серија откако Солскјер пристигна на клупата на тимот. Тој забележа 11 победи во првите 13 натпревари и го врати Манчестер Јунајтед помеѓу првите четири места на табелата во Премиер лигата.
„Мора да играме многу подобро отколку против Парижаните. Непходно е да извлечеме поука од тој натпревар и да останеме фокусирани. Пред нас е голем меч, голем противник и крајниот исход ќе го одлучат деталите. Сепак, веќе не сме аутсајдери. Луѓето сега имаат почит за нас“, изјави Солскјер.
Во моментов, Манчестер Јунајтед се наоѓа на четвртата позиција на табелата со 51 бод, еден повеќе од петтопласираниот Арсенал и шестопласираниот Челзи.
„Не ме интересира што прават другите тимови, заинтересиран сум само за мојот тим. До крајот на сезоната ќе се води жестока борба – три ‘коњи’ во трката за титулата и три ‘коњи’ во трката за четвртото место. Мислам дека конечно одиме во вистинска насока“, додаде Солскјер.
Норвешкиот тренер успеа да го мотивира тимот по заминувањето на Мурињо, со што внесе свежина кај играчите и тие повторно почнаа да играат во нивната препознатлива форма поради која земаат огромни плати од милиони и милиони фунти. Но, тој знае дека има еден човек кој би можел да го мотивира тимот како никој друг.
„Сер Алекс Фергусон е добредојден да одржи говор пред играчите, доколку сака да го направи тоа. Сите играчи знаат колку дуелот со Ливерпул е значаен за Фергусон, но и за Јунајтед како клуб“, заврши Солскјер.
Натпреварот помеѓу Манчестер Јунајтед и Ливерпул е закажан за недела, со почеток од 15:05 часот.