Норвешкиот стратег на клупата на Манчестер Јунајтед стои мирно на земја. Не гаи шампионски амбиции иако неговиот тим, изненадувачки, моментално е на делба на лидерската позиција во Премиер лигата, а со барем бод утре ќе избие сам.
По 17 одиграни кола во Премиер лигата на првото место се Ливерпул и Манчестер Јунајтед со по 33 бода. Ако од Ливерпул сите очекуваа таков пласман, тоа дефинитивно не важи за тимот од „Олд Трафорд“.
Оле Гунар Солскјер е свесен дека неговиот тим во реалноста не е рамо до рамо со Ливерпул, иако бодовите моментално покажуваат такво нешто.
„Па не сме стигнале ни до половина од сезоната, а воедно секој премиерлигашки натпревар е предизвик, тие се тестови сами по себе. Секој натпревар е различен. Вотфорд ни беше тест, Барнли е тест, Ливерпул е уште еден таков, потоа одиме кај Фулам кој е поинаков тест“, објаснува Солскјер зошто не треба никој во Манчестер да летне во облаци со замисла за титула.
„Никој нема да се сеќава како изгледала табелата на 12 јануари 2021 година. Имаме добар моментум, почнавме добро по разочарувањето со Сити, се вративме со победа и се разбира дека повторно сакаме да направиме ваков моментум“.
Јунајтед утре патува на гости кај Барнли со кој треба да го одигра одложениот натпревар од 1. коло. Со победа ќе осамне прв пред Ливерпул. Потоа, в недела следува директниот дуел со Ливерпул и тоа на гости.
„Ако победиме во вторник тогаш ќе имаме два позитивни натпревари по поразот и во наредниот натпревар ќе влеземе со самодоверба. Секој премиерлигашки натпревар е шанса за зголемување на самодовербата“