Предводникот на Манчестер Јунајтед е цел на критики повеќе од било кога, но смета дека откако е на клупата направил премногу за едноставно да се откаже.
Оле Гунар Солскјер нема намера да си поднесе оставка и покрај лавината негативни реакции на навивачите откако неговиот тим синоќа беше тотално понижен од Ливерпул со 5:0 на домашен терен.
Кога судијата свирна крај на првиот дел, а резултатот гласеше 0:4, 70 илјади грла со свирежи го испратија норвешкиот стратег на патот кон соблекувалната.
Но, Солскјер по натпреварот ја презеде одговорноста за бламажата, а изјави и дека нема намера да се повлече.
„Ова е најцрниот ден откако го водам Јунајтед. Не бевме доволно добри, за разлика од Ливерпул кој беше убиствен во нападот. Јас сум одговорен за овој пораз“, рече тој.
„Третиот гол беше пресуден, а четвртиот означи крај на сите наши надежи. Минатата сезона изгубивме од Тотенхем со 6:1, но ова беше многу полошо“, додаде Норвежанецот.
На прашањето кои љубопитните новинари едвај дочекаа да му го постават, за поднесувањето оставка, тој одговори:
„Мораме што побрзо да го заборавиме ова и да продолжиме понатаму. Многу направив за сега да се повлечам. Знам дека го допревме дното, но сигурен сум дека играчите имаат карактер и дека ќе се издигнеме“.
Солскјер, чиј правилен изговор е всушност Сулшер, седна на клупата на Јунајтед на 19 декември 2018 година како вршител на должноста заменувајќи го Жозе Мурињо. Оттогаш има скор од 164 натпревари на кои забележа 90 победи, 36 нерешени и 38 порази, а процентот на победи му изнесува 54,88.
Како играч Солскјер 11 сезони ги бранеше боите на Манчестер Јунајтед во ерата на сер Алекс Фергусон и освои 6 титули во Премиер лигата, 2 ФА купа, 2 Суперкупа и по 1 Лига на шампиони и Интерконтинентален куп. Како тренер сѐ уште нема трофеј со Јунајтед.
