Манчестер Јунајтед прокоцка одлична шанса да дојде до 3. место на табелата, но доцна примениот гол од Саутемптон ги остави само со бод.
Оле Гунар Солскјер најдобро знае како е да се постигне гол во судиското надополнување. Токму тој како играч се прослави во голот во 90+3 во финалето од Лигата на шампиони во 1999 година играјќи за Манчестер Јунајтед против Баерн, гол со кој донесе победа од 2:1 и нормално, драгоцениот пехар.
Неговиот тим синоќа прими гол во 6. минута од судиското надополнување, гол поради кој испушти важни 3 бода во битката за влез во Лигата на шампионите.
„Тоа е најлошото време за да се прими гол, но тоа се случува во фудбалот. Мораме да го прифатиме тоа бидејќи самите ние многу пати сме победиле на таков начин. Едноставно, тоа е дел од процесот на учење, тимот е разочаран поради губењето на бодовите, но тоа е“, изјави норвешкиот стратег за Sky Sports.
Саутемптон всушност прв поведе преку Стјуарт Армстронг во 12. минута, а потоа за само три минути од 20-тата до 23. минута Маркус Рашфорд и Антони Марсијал направија пресврт. Нововлезениот Мајкл Обафеми во 96-тата минута израмни на 2:2.
„Веројатно и не ги ни заслуживме трите бода. Тие играа добро. Физички се добри, одлично подготвени. Ние воопшто не фативме ритам кога станува збор за пас играта, особено откако победовме со 2:1, но создававме шанси, на моменти игравме одличен фудбал“.