Данската полиција отвори истраги за бројни писма што содржат закани и неидентификувана прашкаста материја, пратени од Белгија до неколку компании за преработка на храна во Данска.
Уфе Стормли од данската национална полиција изјави дека во писмата имало „опасна супстанца“, но не даде повеќе детали бидејќи истрагата е во тек, пренесе Associated Press.
Данските медиуми објавија дека во писмата било барано „откуп“ од 30.000 евра или во спротивно производите од тие компании „ќе бидат затруени“.
Од Danish Crown AmbA, што се смета за најголема компанија за преработка на месо во Европа, потврдија дека вакви писма стигнале на нивна адреса.
Во соопштението се наведува дека слични писма биле испратени и на адресите на неколку компании за преработка на храна низ Данска и Европа.
Од компанијата додадоа дека ни вработените, ни потрошувачите не се во опасност.
