Сопругата на поранешниот полицаец Дерек Шовен, кој се товари за убиството на Афроамериканецот Џорџ Флојд, поднесе барање до судот да ѝ биде дозволено да си го врати моминското презиме во бракоразводната постапка.
Кели Шовен се разделила од сопругот на 28 мај, според документите до кои дојде магазинот People. Таа го напуштила Дерек Шовен еден ден пред да биде обвинет за убиство од трет степен за смртта на Флојд.
Во документите е наведено дека дошло до „неповратно растурање на бракот“. Дерек и Кели Шовен се венчале во јуни, 2010 година. Немаат заеднички деца, а Кели има деца од претходен брак.
Покрај тоа што побарала да го смени презимето, Кели Шовен бара да ги добие во разводот двете куќи: примарното живеалиште во Минесота и втората куќа во Орландо, Флорида. Таа не бара алиментација и наведува дека може сама да се издржува со работата како агент за недвижнини.
Адвокатката на Кели Шовен, Аманда Мејсон-Секула, во неделата излезе со изјава во нејзино име во која рече дека таа е „ужасната од смртта на господин Флојд и изразува сочувство до семејството, неговите блиски и сите кои се ожалостени во оваа трагедија“.
„Таа поднесе барање за развод од Дерек Шовен. Иако нема деца од овој брак, таа замолува децата од нејзиниот претходен брак, нејзините родители и поширокото семејство да бидат поштедени и да им се обезбеди правото на приватност во овие тешки времиња“.
Дерек Шовен по апсењето е префрлен во затвор за највисоко ниво на обезбедување во Минесота. Во затвор му е овозможен пристап до телефон и видео-посети, посети во живо не се дозволени поради епидемијата со коронавирусот. Нема право на кауција.