Босиљка Младиќ, сопруга на воениот злосторник Ратко Младиќ, рече дека тој „не ја заслужува казната што му беше изречена од Механизмот за меѓународни кривични судови во Хаг“. Таа тврди дека Младиќ, како човек и како војник, е крајно морален и праведен.
„Ратко не заслужи таква казна. Ратко, како човек и како војник, е многу морален, праведен. Тој е за некое друго време, но претпоставувам дека ќе дојдат еден ден тие денови што ќе сведочат дека не бил суден ниту по закон, ниту праведно“, вели сопругата на Младиќ кој вчера беше осуден на доживотен затвор.
Таа посочи дека второстепената пресуда со која се осудува на доживотен затвор Ратко Младиќ е „последниот удар од кој на семејството ќе му биде тешко да се опорави“.
„Сега, но само засега, оваа неправедна судска одлука е најдлабоката рана“, рече таа за Večernje novosti, додавајќи дека е убедена дека „за генералот Младиќ еден ден ќе се пишува поинаку“.
„Во хармонија и разбирање поминавме повеќе од половина век и можам да посведочам дека неговите примарни човечки принципи беа напорна работа и дисциплина. Не, тој никогаш не би ги прекршил правилата на војување“, рече Босиљка Младиќ.
Апелацискиот совет на Хашкиот трибунал вчера ја потврди доживотната казна затвор за командантот на Генералштабот на армијата на Република Српска, Ратко Младиќ. Меѓу другото, беше осуден и за геноцидот во Сребреница.
Покрај семејството во негова одбрана застанаа и бројни медиуми и политичари во Република Српска и во Србија.
