Фондацијата на филантропот, бизнисмен и политички активист Џорџ Сорос соопшти дека ја затвора канцеларијата во Унгарија, со објаснување дека опкружувањето во земјата станува „сѐ поопресивно“.
Фондацијата Отворено општество што финансира невладини организации, најави дека ги преместува операциите во главниот град на Германија, Берлин.
Десничарската влада на унгарскиот премиер Виктор Орбан најави дека планира да ги затегне ретрикциите за невладини организации.
Слоганот во изборната кампања на Орбан, кој месецов доби уште еден мандат, гласеше: „Стоп Сорос“.
Сорос ги негира обвинувањата на Орбан дека неговата фондација е дел од поголем план да се донесат мигранти во Европа за да се поткопаат тамошните нации.
Фондацијата на Сорос се најде под силен бран вербални и правни напади од владата на владејачката партија Фидеш во изминатите три години.
„Унгарската влада ја омаловажува и погрешно ја претставува нашата работа и го опресира граѓанското општество за свои политички цели, користејќи тактики какви што не биле видени досега во историјата на ЕУ“, рече претседателот на Фондацијата, Патрик Гаспар.
„Стана невозможно да ја заштитиме безбедноста на нашите операции и вработени во Унгарија од произволните владини мешања“, додаде тој.
Новиот закон предложен од владата предвидува затегнување на правилата за финансирање на НВО од странство, поради осигурување на државната безбедност, тврди владата на Орбан.
Се очекува ова да биде еден од првите закони што ќе ги донесе новиот парламент во следните недели.
Сорос, кој е родум Унгарец, од 80-тите години наваму има потрошено 12 милијарди долари, главно преку Фондацијата Отворено општество, на граѓански иницијативи за намалување на сиромаштијата и зголемување на транспарентноста, како и за школарини и стипендии во универзитети ширум светот, особено во Источна Европа и земјите од поранешниот Советски Сојуз.