Американскиот милијардер Џорџ Сорос рече дека претседателот Доналд Трамп е „невиден нарцис кој се смета за семоќен и сака да го уништи светот.“
Сорос во интервју за „Washington Post“ изјави дека ако Демократската партија победи на општите избори со убедлива разлика есенва и освои мнозинство во Конгресот и Сенатот ќе може да го симне Трамп од власт пред да му заврши мандатот.
Трамп и Сорос се во лоши односи уште од претседателските избори на кои Трамп ја победи демократката Хилари Клинтон која Сорос ја поддржуваше. Сорос донираше над 10,5 милиони долари во кампањата на Клинтон, според податоците на Центарот за одговорна политика во Вашингтон.
Националистичката и протекционистичката политика на Трамп се коси со глобалистичката и либерална политика за која се залага Сорос.
„Мојата ментална слика за Трамп е дека е невиден нарцис. Сметам дека воопшто не беше подготвен да победи на изборите. Ниту тој, ниту (рускиот претседател Владимир) Путин не очекуваа дека ќе победи на изборите“, додаде Сорос во интервјуто.
Тој исто така зборуваше за сѐ позасилената автократија во светот и го критикуваше претседателот Трамп за неговите ставови за Северна Кореја, климатските помени и глобализмот.
Сорос уште во почетокот на годинава на форумот во Давос, Швајцарија предвидуваше дека на Трамп му се ближи крајот.
„Сметам дека администрацијата на Трамп претставува опасност за светот. Но, сметам дека ќе биде само краткотраен феномен што ќе исчезне до 2020 година, ако не и порано“, рече тогаш Сорос.