Голем број американски медиуми деновиве ја споделија приказната за убиството на Тупак Шакур, откако го слушнаа сведоштвото на Дуан Кит Дејвис, попознат како Киф Ди, во кое тој тврди дека учествувал во инцидентот во кој загина познатиот рапер.
Во интервјуто за американскиот крими-документарец „Unsolved: The Tupac and Biggie Murders“, Дејвис зборуваше за убиството на Тупак Шакур и призна дека бил сведок на настанот.
Самопрогласениот „Шеф на Комптон“ го почна признанието со изјавата дека има рак и поради тоа има имунитет од судење, па токму поради тоа решил да признае цели 20 години подоцна. Дејвис вели дека тој седел на совозачкото седиште, веднаш до Теренс Браун, кој управувал со возилото. Деандре Смит и братучедот на Дејвис, Орландо Андерсон, седеле на задните седишта, а сите тие биле членови на бандата Крипс.
Четворицата се упатиле кон клубот 662 - сопственост на Шуг Најт, за таму да го побараат раперот Тупак, кој само неколку дена претходно претепал член на нивната банда. Откако Тупак не се појавил, тие го напуштиле клубот и додека си заминувале го виделе раперот како се вози кон 662.
„Мојот другар сврте полукружно и кога застанавме, јас бев на предното седиште. Ќе го зачувам името за себе поради законот на улицата, но ќе кажам дека пукањето дојде од задните седишта“, рече Дејвис.
„Кога веќе боледувам од рак, решив дека е правилно да ја кажам вистината. Случајот е стар повеќе од 20 години“, рече Дејвис.
Иако Дејвис рече дека нема да го открие името на убиецот, на претходните снимки кои полицијата ги објави тој кажува дека Орландо Андерсон го убил Тупак Шакур. Андерсон претходно неколкупати ја негираше вината за убиството на Тупак пред и самиот да биде убиен во престрелка помеѓу банди.
Засега никој не е осуден поради убиството, иако многумина се прашуваат како е можно Киф Ди да не биде во затвор бидејќи тој е соучесник во инцидентот, без разлика што не го испалил смртоносниот истрел.
