Откако се исмејуваа со принцот Хари и Меган Маркл, креаторите на популарната серија „South Park“ сега се нафрлија на уште една позната личност.
Во најновата епизода на „South Park“ се појавува лик по име Алонзо Финески.
Ќелавата фигура со очила за сонце и пура во устата е слика и прилика на инфлуенсерот Ендрју Тејт, кој е во притвор во романски затвор под обвинение за сексуална злоупотреба и експлоатација.
Во епизодата, Алонзо му вади пиштол на Ренди Марш, а Ренди му кажува дека само се обидува да им покаже на своите деца што е вистинска забава.
„Видете, јас само се обидувам да се борам против пораките што либералната левица им ги испраќа на младите мажи дека нивните машки инстинкти се токсични. Се обидувам да им покажам на мојот син и неговиот мал луд пријател што е вистинска забава бидејќи општеството сака тие да се срамат од нивната машка природа“, вели Ренди во очигледна референца на шовинистичките изјави и идеи на Тејт за машкоста.
Во подоцнежна сцена, полицијата доаѓа на забавата и му наредува на Алонзо да остане мирен.
„Тоа е Алонзо Финески, романски трговец со секс робинки“, вели еден од полицајците.
Алонзо потоа пцуе и како одмазда испукува куршуми кон полицијата, а по пукањето бега од местото.
Епизодата предизвика бројни реакции на Twitter, а се огласи и Тејт.
„Кога ќе се докаже дека сум невин. Со нетрпение очекувам да помогнам да се создаде најдобрата епизода во 'South Park' на сите времиња“, напиша тој покрај клипот од серијата.
