Сета таа храна и пијалаци што ги внесуваме за празниците се тешки за стомакот. Затоа откако ќе завршат празниците не е лошо да обрнеме малку внимание и да му помогнеме на телото побрзо да се освежи и прочисти.
Нутриционистката Стефани Мастерман има неколку едноставни совети за прочистување на организмот по празниците.
1. Немојте да се изгладнувате
Мастерман вели дека оние кои сакаат да намалат килограми или да внимаваат на здравјето да заборават на изгладнувањето. Таа советува консумација на разновидна храна за да се внесат сите хранливи состојки.
„Храната што ја јадеме обезбедува состојки потребни за детоксикација, а изгладнувањето ги спречува органите важни за детоксикација нормално да функционираат. Црниот дроб, белите дробови, бубрезите, цревата, кожата сите тие органи заедно работат за да се ослободат од токсини, но за секој орган се потребни хранливи материи за да функционира како што треба“, објаснува таа.
2. Не очекувајте чуда
„Производите за детоксикација често ветуваат драматичен губиток на килограми, дека ќе изгледате 10 години помали и слично. Ако верувате во тоа, брзо ќе останете без пари. Една од најчестите новогодишни одлуки е губење на килограми. За брзо слабеење луѓето најчесто одат на таканаречени течни диети, нискокалорични пијалаци и слично“, вели таа.
Со придржувањето на ваков режим на исхрана можеби ќе намалите килограми, но ќе изгубите доста течности од организмот, гликоген, па дури и мускули. Здравата исхрана, физичката активност и избегнувањето работи кои не се добри за здравјето се најдобриот начин да се чувствувате добро и така да изгледате.
3. Што треба да јадете?
Човечкото тело може самото да ги исфрли токсините, а храната богата со витамини, минерали, здрави масти и антиоксиданси помага во тоа.
Таа советува да јадете повеќе цитрусно овошје, да пиете зелен чај, да јадете цвекло, ореви и семиња, како и зрнесто овошје (боровинки, малини, капинки, аронија, рибизли).