Слабеењето е процес што секој одлучува да го направи одвреме-навреме, или барем оние кои се борат со вишокот килограми. Со оглед на тоа што денес постојат безброј диети и тренинзи за слабеење, сосема е нормално дека одвреме-навреме ќе наидете на совети кои не се потврдени или базирани на научни податоци.
Тајната за здраво слабеење не треба да биде слепо следење на сите совети и правила кои сте ги слушнале, па затоа ви носиме некои кои дефинитивно не треба да ги следите. Всушност, подобро би било целосно да ги избегнувате бидејќи тие можат само да го саботираат вашето слабеење.
Често слушаме дека прескокнувањето на појадокот е една од најголемите грешки при слабеење. Сепак, појадокот не е строго неопходен за здраво слабеење, велат експертите. Во истражувањето спроведено на оваа тема се покажало дека прескокнувањето на појадокот може да резултира со слабеење, а единствено важно е тоа да не стане навика. Луѓето кои го прескокнале појадокот консумирале 144 калории повеќе на ручек во споредба со оние кои појадувале, но нивниот вкупен внес на калории бил 408 помалку, пишува Healthline.
Прекумерното внесување маснотии е една од главните причини за зголемување на килограмите, но тоа не значи дека треба да ги избегнувате сите масни намирници бидејќи, велат нутриционистите, тоа нема да ви помогне побрзо да ги намалите килограмите. Наместо тоа, фокусирајте се на храна која содржи таканаречени „здрави масти“, како што се јаткастите плодови, маслиново масло, семки и риба, бидејќи тие му помагаат на вашето тело да ги апсорбира важните хранливи материи.
Иако некои нездрави намирници најдобро е да се избегнуваат, тоа не значи дека воопшто не треба да ги јадете. Најважните во слабеењето се навиките, па нутриционистите велат дека можете слободно да јадете што било доколку не претерувате. Ако сакате чипс, тоа не значи дека не можете да јадете неколку парчиња еднаш месечно. Со целосно откажување од нездрава храна, вашето тело само уште повеќе ќе ја посакува.
Иако често се препорачува постепено слабеење, најновите истражувања покажуваат дека брзото почетно слабеење на ниту еден начин не го зголемува ризикот од враќање на тежината. Покрај тоа, брзото губење на тежината се чини дека е корисно за долгорочно губење на тежината. Студијата покажа дека луѓето кои брзо изгубиле тежина во текот на првиот месец од диетата имаат пет пати поголеми шанси да изгубат 10 отсто од својата телесна тежина во рок од 18 месеци, во споредба со оние кои слабеат побавно.
Познато е дека кардио вежбите ефикасно го намалуваат нивото на стрес и имаат голем број на придобивки за вашето срце, како и за целокупното здравје. Сепак, според неодамнешните истражувања, кардиото не е нужно најдобрата стратегија за слабеење. Ефективноста на овие вежби ќе зависи од поединецот, така што некои луѓе губат тежина, додека други не можат. Многу тренери се согласуваат дека за најдобри резултати идеално е да се комбинираат вежби за сила со трчање, одење и слични активности.
