Во натпревар кој служеше како загревање за утрешното финале, репрезентацијата на Белгија ја победи репрезентацијата на Англија и стигна до првиот медал на Светските првенства. Иако само бронзени, играчите од златната генерација на Белгија се враќаат дома како победници.
Надежите за медал на Англија згаснаа, но нивните навивачи сепак тврдат дека се задоволни од финалниот пласман на репрезентацијата.
Не беше потребно многу време за Белгија да го отвори резултатот бидејќи во четвртата минута десниот бек Муние се најде во шеснаесетникот на Англија и го претвори во гол одличниот центаршут на Нацер Чадли. До крајот на првото полувреме Белгијците ја имаа топката во свој посед а Англичаните пробаа да нападнат преку прекини.
Второто полувреме не донесе големи изненадувања. По неколкуте измени на двете страни, Белгија само ја потврди доминацијата и при крајот на натпреварот, во 82 минута, де Бруин поведе контра напад и со одлична асистенција успеа да го пронајде Хазард, кој беше сигурен кога излезе 1-на-1 со голманот. Така беше поставен конечниот резултат и Белгија се закити со првиот медал на Светските првенства во историјата на оваа земја.
Финалето е на програмата утре, со почеток од 17:00 часот. Во него ќе се сретнат репрезентациите на Франција и Хрватска.