После комплетирањето на првото коло од групната фаза во натпреварувањето на Светското фудбалско првенство во Русија, уште еднаш добивме потврда за доминацијата на Европа во светскиот фудбал.
Иако актуелниот Светски првак Германија не започна најдобро, односно доживеа изненадувачки пораз од Мексико со резултат од 1:0, сепак европските сили вкупно забележаа осум победи, четири нерешени резултати и два порази.
Вчера серијата ја продолжи и Русија со победата од 3:1 над Египет, во отворањето на второто коло од групната фаза на Мундијалот.
Доминацијата на Европа е очекувана, а изненадување претставуваат некои други интересни статистички податоци.
Имено, почетокот на овогодинешното првенство го одбележаа погодоци постигнати од прекини. Во првото коло од прекини се постигнати дури 20 од вкупно 38 гола на првенството, што е 52,6 отсто.
На последното СП во Бразил од прекини беа постигнати 38 од вкупно 171 голови, што е 22 отсто.
Денеска продолжува второто коло од групната фаза и тоа со Португалија и Роналдо кој токму од прекин, односно со прекрасен погодок од слободен удар и донесе на својата селекција бод против Шпанија, па останува да видиме дали ќе се продолжи и трендот за постигнување на многу голови од прекини на ова првенство.
Погледнете како изгледа табелата за ефектот на ова првенство на репрезентациите ширум светот:
Селекции од Европа: 8 победи, 4 нерешени, 2 порази;
Селекции од Азија: 2 победи, 0 нерешени, 3 порази;
Селекции од Јужна Америка: 1 победа, 2 нерешени, 2 порази;
Селекции од Северна и Средна Америка: 1 победа, 0 нерешени, 2 порази;
Селекции од Африка: 1 победа, 0 нерешени, 4 порази;