Во третото коло од групата А на Светското првенство, Уругвај ја совлада Русија со резултат од 3:0, додека Саудиска Арабија го надигра Египет со резултат од 2:1.
Уругвај го победи домаќинот со 2:0 и тоа со головите на Суарез, кој погоди од слободен удар уште во 10 минута, а потоа во 23 минути Лаксалт упати удар кон противничкиот гол, но топката се одби од Черишев и заврши во мрежата на Акинфеев за 2:0.
Сите надежи на Русија паднаа во вода во 36 минута од натпреварот, кога Смолников за само девет минути доби два жолти картони и мораше да го напушти теренот.
Во 90 минута од средбата Кавани после гужва во противничкиот шестнаесетник погоди за конечни 3:0.
Уругвај на овој начин со три победи се најде на првото место и во осминафиналето ќе игра против второпласираната селекција од групата Б, додека Русија ќе игра против победникот на таа група.
Во натпреварот кој не одлучуваше за пласман во следната рунда помеѓу Саудиска Арабија и Египет, кој заврши со 2:1 за Саудиска Арабија, падна и еден рекорд.
Имено, голманот на африканската селекција Есам Ел Хадари со 45 години и 161 ден стана најстариот играч на Светските првенства.
Салах уште во 22 минута го доведе Египет во водство, а веќе споменатиот голман Ел Хадари стапи на сцена во 41 минута кога и одбрани пенал на Саудиска Арабија.
Но, во финишот на првиот дел судијата Ролдан досуди уште еден пенал за Саудиска Арабија, кој Ал Фарај го претвори во гол.
Кога се чинеше дека средбата ќе заврши без победник, Ал Давсари во 95 минута погоди за победа на Саудиска Арабија и трето место во групата А.