Ракетата Falcon 9 на SpaceX вчера полета во вселената, носејќи досега најголем број сателити, соопшти приватната вселенска компанија во сопственост на магнатот Илон Маск.
Ракетата беше лансирана од Кејп Канаверал, Флорида во 10 часот наутро (16 часот по средноевропско време), 24 часа подоцна од првично планираното, поради лошите временски услови.
Енди Тран, управник на SpaceX, во видеото што го придружуваше лансирањето, рече дека Falcon 9 превезува 133 комерцијални и владини сателити и 10 сателити на SpaceX.
„Ова е досега најголемиот број сателити испратени на една мисија“, додаде тој.
SpaceX го испраќа Falcon 9 како дел од програмата позната како „rideshare“, според која помалите компании му плаќаат на Маск за лансирање на нивната технологија во вселената.
SpaceX преку Twitter соопшти дека лансирала 143 сателити.
Компанијата сака да стави во орбитата илјадници помали сателити кои ќе ја формираат мрежата Starlink што ќе овозможи пристап до брз интернет од вселената.
Некои научници изразија загриженост за големиот број сателити кои кружат околу Земјата. SpaceX тврди дека тие се дизајнирани да изгорат во атмосферата по неколку години.
