На официјалниот YouTube канал на телескопот Subaru, со кој управува Националната астрономска опсерваторија на Јапонија, е споделено видео на кое се гледа мистериозен вител на светлина во форма на спирала што накратко се појавува на ноќното небо над Маунакеа на Хаваите.
„Навистина необична глетка! Некаква идеја што е тоа? Нашите воодушевени гледачи го открија овој редок настан. Видеото е од нашата камера Subaru-Asahi STAR, заеднички управувана од НАОЈ (Subaru телескопот) и Asahi Shimbun (јапонска новинска компанија)“, се вели во објава на YouTube.
Според Националната астрономска опсерваторија на Јапонија (НАОЈ), се покажа дека зашеметувачката спирала се состои од замрзнато ракетно гориво исфрлено за време на лансирањето на ракетата SpaceX.
Интернет корисниците брзо реагираа на видеото. Беа заинтригирани од мистериозната летечка спирала и бараа објаснување. Некои корисници дури правеа шеги за вонземјани и вселенски бродови.
„Боже господе, Андромеда пристигна 4 милијарди години порано!!“ напиша еден корисник. „Еј Илон Маск, дали си ова ти или вонземјани?“, коментираше друг.
Како што објави Space.com, виновникот за спиралата лежи во лансирањето на SpaceX ракетата Falcon 9 која се крена од вселенската станица „Кејп Канаверал“ на Флорида на 18 јануари. Во извештајот се споменува и дека вакви спирали биле забележани и во минатото. Обично се појавуваат кога Falcon 9 исфрла вишок гориво во горната атмосфера.
