SpaceX синоќа го осветли небото над Калифорнија и успешно лансираше сателит во вселената со помош на Falcon 9 ракета. По крајот на операцијата, ракетата беше успешно приземјена на брегот, за првпат во историјата на оваа компанија.
Falcon 9 ракетата го испрати сателитот SAOCOM 1A во вселената од базата Ванденберг, на југозападниот брег на Лос Анџелес.
Веднаш по успешното лансирање на сателитот, SpaceX успеа да ја приземји ракетата назад на земја, со што за првпат Falcon 9 ракета беше приземјена на Западниот брег на САД. Досега лансирањата на Falcon 9 ракети се случуваа од базата во Кејп Канаверал и сите 11 лансирања завршуваа со успешно призејмување на ракетите.
Falcon 9 дел од линијата ракети кои можат да се употребуваат одново по нивниот лет, со што SpaceX станува атрактивна компанија за потенцијалните инвеститори, но и одржува помали трошоци за производство на ракети.
Ова беше 30-то успешно лансирање на Falcon 9 ракета за компанијата, но досега ниту едно не беше изведено на Западниот брег. Милијардерот Елон Маск, кој е основач на компанијата, реши да се пофали за новиот успех на неговиот Twitter профил.
Сателитот SAOCOM 1A беше лансиран за да помогне при откривањето на природни катастрофи, влажност на почвата и временски опасности. Тој ќе може да ги детектира овие промени од 620 километри над Земјата.
