Лучано Спалети по сѐ изгледа ќе биде нов предводник на Милан откако се согласил да го прифати предизвикот.
Очигледно деновите на Марко Џампаоло на клупата на „росонерите“ се избројани. Лошите резултати на тимот и особено лошата игра ги натера челниците да ја искористат репрезентативната пауза за промена на кормилото.
Спалети е без ангажман откако заработи отказ од Интер по завршувањето на минатата сезона за тимот да го преземе Антонио Конте. Но, тосканскиот стратег сѐ уште добива плата од „нераѕурите“ бидејќи договорот му истекува дури во 2021 година.
Слични услови ќе добие и Џампаоло доколку Милан му врачи отказ за да го земе Спалети.
Лучано Спалети се согласил да го преземе Милан, но договорот допрва треба да биде потпишан откако двете страни ќе ги договорат финансиските детали. На договор се моли и Интер бидејќи само на тој начин превреме ќе се ослободи од давачките кон Спалети.