Истражителот на Специјалното јавно обвинителство (СЈО) кој беше приведен синоќа во полициската станица Беко, го привеле оти фотографирал објект што бил во сопственост на поранешниот директор на Управата за безбедност и контраразузнавање, Сашо Мијалков.
Ова синоќа го соопшти министерот за внатрешни работи, Оливер Спасовски на прес - конференција. Тој не кажа дали се работи за приватен објект на Мијалков и на каква задача бил истражителот, а Јанева рече дека истражителот бил да лоцира каде живее одредено лице.
Обезбедувањето на објектот повикало полиција, а истражителот бил приведен по наредба на јавен обвинител од Основното јавно обвинителство. Истражителот бил пуштен откако интервенираше Специјалната јавна обвинителка, Катица Јанева.
Јанева потоа се врати во Министерството за внатрешни работи, односно во УБК каде ја чекаше уште еден истражител кој беше избркан од таму.
По три дена присуство во УБК, Јанева и нејзиниот тим синоќа си заминаа од УБК откако Спасовски им ветил дека ќе ангажира полициско обезбедување за да ги чува системите за следење на комуникациите и ги уверил дека ниту еден податок или пак било каква опрема нема да излезе од МВР.
СЈО со судска наредба прибира податоци од системот за следење на комуникациите за да утврди кој прислушувал во Македонија.