Косовските медиуми објавија снимка од упад на специјалните единици на косовската полиција РОСУ во северниот дел на Косово.
Klan Kosova на својот профил на Facebook објави снимка во 7 часот и 20 минути утрово на која наводно се гледа дел од акцијата што била изведена околу 5 часот и 50 минути.
Според сознанијата на Танјуг, повеќе од 100 припадници на РОСУ со 25 оклопни возила и џипови влегле во северниот дел на Косово и дека биле уапсени Срби.
Два часа по нападот, се огласи косовската полиција и соопшти дека денеска во раните утрински часови во северниот дел на Митровица била спроведена акција во врска со убиството на Оливер Ивановиќ.
„Оваа полициска акција беше изведена врз основа на налог за претрес што го издаде Посебното одделение на Основниот суд, а резултираше со апсење на осомничен полицаец (Р.Б.) вклучен во налогот за претрес“, стои во соопштението.
Се наведува дека продолжува потрагата по уште еден осомничен полицаец.
„Во текот на полициската акија уапсен е уште еден осомничен кај кого е пронајдено оружје. Во операцијата се пронајдени и запленети уште две парчиња оружје и муниција“, стои во соопштението.