Фудбал

Специјален пренос на Бока-Ривер за оние со слабо срце

10. ноември 2018 - 18:26 | А.С.

Првиот меч од финалето на Копа Либертадорес меѓу Бока Јуниорс и Ривер Плејт се игра вечерва од 21 часот, а аргентинските гиганти се навикнати нивните средби да бидат исполнети со борба, жар, шанси и возбудувања кои нема да недостигаат во трката за најважниот трофеј на јужноамериканскиот континент.

Со оглед на тоа колку верните навивачи на двата тима сериозно си ги сфаќаат овие средби и со цел да нема несакани исходи од возбудата кај луѓето со слабо срце, беше смислен специјален радиопренос што на мирен, спокоен начин ќе ја пренесува атмосферата од стадионот.

Коментаторите на овој пренос нема да ја креваат тензијата на секоја шанса, нема да го повишуваат тонот додека зборуваат и во секој поглед ќе пренесуваат посмирена верзија на она што ќе се случува на теренот и на трибините.

Нема никакво сомнение дека тоа ќе биде убедливо најдосадниот пренос на фудбалски натпревар што некогаш сте го слушале, но здравјето сепак е најважно.

Ова ќе биде 247. средба на двата тима чие ривалство трае од 1913 година, а досега за малку е поуспешна Бока со 88 победи. Ривер имаат славено на 81 дуел, а без победник средбите завршиле 77 пати.

Бока шест пати го има освоено пехарот на Копа Либертадорес, а Ривер три пати.

Коментирај