На Twitter излезе слика од албумот на Panini за Европското првенство на која се гледа страницата каде што е репрезентацијата на Македонија.
Фотографијата е од Македонец од Швајцарија каде албумот е во продажба само онлајн. Засега во ниту една земја не е достапен во слободна продажба, а тоа веројатно ќе се случи наскоро.
Обично албумите на Panini, било за Светско или за Европско, излегуваат во март во некои земји, но сега поради пандемијата и неизвесноста за самата локација на натпреварите од ЕУРО 2020, и излегувањето на популарниот албум е пролонгирано.
Од она што се забележува на фотографијата, секоја репрезентација има по 20 играчи, а за жал нема тимска фотка.
Нашите играчи во Panini се голманите Столе Димитриевски и Дамјан Шишковски, потоа Егзон Бејтулаи, Висар Муслиу, Кире Ристевски, Стефан Ристовски, Дарко Велковски и Ѓоко Зајков од одбраната, Аријан Адеми, Езџан Алиоски, Енис Барди, Елиф Елмас, Тихомир Костадинов, Бобан Николов и Стефан Спировски од средината и Илија Несторовски, Горан Пандев, Влатко Стојановски, Александар Трајковски и Иван Тричковски од нападот.
Односно, тоа се и играчите кои играа изминатиот период, па во Panini и немале тешка задача да одлучат кои да ги одберат со оглед на тоа што нашиот селектор и онака повикуваше малку играчи, а дел од нив играа повеќе на тренинг отколку на натпреварите.
