Каталонскиот весник Sport објави вистинска трансфер-бомба. Според тврдењата на весникот, Еден Азар постигнал договор со Реал Мадрид, а наводно познати се и деталите од договорот.
Белгискиот репрезентативец се очекува да потпише петгодишен договор вреден 16,5 милиони евра по сезона и со тоа би станал вториот најплатен играч во клубот, по Гарет Бејл.
Сега останува Реал и Челзи да се договорат околу трансферот. Азар има договор со англискиот клуб до крајот на летото 2020 година, а на „Стемфорд Бриџ“ прават сѐ за да ја одложат забраната за трансфери од УЕФА и да можат да го реализираат преминот.
Реал наводно понудил околу 80 милиони евра за Азар, а лондонскиот клуб бара околу 115 милиони евра. Поранешниот играч на Лил со години е голема желба на претседателот на Реал Флорентино Перез, па нема да биде неочекувано, ако Азар ја прифати преселбата во Мадрид, двата клуба да се „најдат на средина“ и да се договорат за 105 милиони евра за да се оствари големиот трансфер.
Во редовите на Реал Мадрид остана голема празнина по заминувањето на ѕвездата Кристијано Роналдо, што уште никој ја нема достојно пополнето, па многумина сметаат дека Азар совршено ќе се вклопи во тимот.
Многу фудбалски познавачи сметаат дека Азар ќе го напушти Челзи на крајот на сезоната, а во прилог на таквите мислења е фактот дека „сините“ веќе го имаат договорено трансферот на Кристијан Пулишиќ од Борусија Дортмунд за 64 милиони евра.
