Седумкратниот светски шампион Луис Хамилтон изрази загриженост за насоката во која се движи Формула 1 со воведувањето на новите технички правила, но додаде дека се надева дека болидите за 2026 година сепак ќе успеат пријатно да го изненадат.
Револуционерни промени во дизајнот и моторите ќе стапат на сила од сезоната 2026, при што уделот на електричната енергија во погонскиот систем на автомобилот ќе се зголеми од 20 на 50 проценти.
Хамилтон не се снајде добро во Ферари, но се надева дека ќе може да се адаптира на овој болид.
„Ми недостига звукот. Кога ќе го чуете V12 моторот, кога ќе помине Ферари, тоа е страст. Бидејќи се префрливме на V6 моторот, иако тоа е добра насока од гледна точка на одржливост, што е секако позитивно, не можете да го избегнете фактот дека звукот не е ист како кога ќе го погледнете Ферарито на Шумахер од 2003 година“, рече Хамилтон.
Поранешниот светски шампион, исто така, ја истакна важноста на различноста во Формула 1.
„Каде и да одам, ретко гледам луѓе што личат на мене. Кога почнавме да работиме на филмот, различноста беше една од клучните теми. Сакаме да покажеме како може да изгледа Формула 1 и како треба да изгледа“, рече Британецот.
Викендов се одржува Големата награда на Монако.
