Кој ќе биде шампион во Ф1? Последната трка од сезоната се вози денеска во Абу Даби

Последната трка во Формула 1 за 2025 година се одржува денес во Абу Даби, а тројца возачи се борат за шампионската титула - Ландо Норис, Макс Верстапен или Оскар Пјастри.

Верстапен ја освои пол-позицијата и ќе ја води трката пред возачите на Мекларен, Норис и Пјастри, за кои не се очекува премногу да ризикуваат на почетокот на трката.

Сепак, на почетокот мора да внимаваат на Џорџ Расел, кој стартува четврти и кој би можел да се меша помеѓу двајцата возачи на британскиот тим.

На лидерот во светскиот шампионат, Норис, потребен му е пласман на подиумот за да ја обезбеди титулата, без оглед на тоа дали Верстапен ќе победи или не.

Затоа Мекларен објасни дека ќе биде поважно Британецот да го задржи второто место, бидејќи внатрешната линија не е најдобра опција во првиот свиок од патеката и Норис мора да биде внимателен.

Норис води во генералниот пласман со 408 бодови, Верстапен е втор со 396, додека Пјастри е трет со 392.

Директен пренос од трката во Формула 1 од Абу Даби ќе се емитува на Arena Adrenalin со почеток во 14:00 часот.