Макс Верстапен победи на последните две трки во шампионатот на Формула 1 и ја намали разликата на 69 поени во однос на лидерот Оскар Пјастри, возач на Мекларен.
Двете победи на Холанѓанецот повторно ја разгореа приказната за тоа дали четирикратниот светски шампион би можел да влезе во борбата за титулата.
Кога беше прашан за тоа пред Големата награда на Сингапур, Макс имаше интересен одговор.
„Моите шанси се 50%. Или ќе ја освојам или нема.“
Холанѓанецот славеше во Монца и Баку и се надева на слично сценарио во Сингапур.
„Тимот заврши одлична работа. Имам болид кој повторно е конкурентен. Верувам дека можеме да постигнеме добар резултат во Сингапур“, рече Верстапен.
Интересно е што и другите возачи беа прашани како ги гледаат шансите на Макс во борбата за возачите на Мекларен. Леклерк му даде 20%, Алекс Албон 15%, а Исак Хаџар само 10% шанси да ја одбрани титулата.
