Верстапен и Алонсо огорчени, Хамилтон ужива во новата Ф1 ера

Тројцата најуспешни возачи на денешната Формула 1, Луис Хамилтон, Макс Ферстапен и Фернандо Алонсо, излегоа со сосема различни впечатоци за новата ера на шампионатот по Големата награда на Кина.

Додека Хамилтон е воодушевен од дуелите на патеката, Верстапен верува дека новото тркање „нема никаква врска со вистинскиот автомобилизам“, додека Алонсо ја опишува сезоната како „светско првенство на батерии“.

По трката во која го освои првиот подиум за Ферари, Британецот особено ја пофали борбата со својот тимски колега, Шарл Леклер.

„Беше фантастично тркање. Веројатно најдобрата борба што ја доживеав во Формула 1“, рече Хамилтон, додавајќи дека дуелите за време на трката биле како картинг – постојана битка напред-назад без контакт.

Сепак, Верстапен има сосем спротивно мислење.

Возачот на Ред Бул се повлече од трката поради проблеми со системот за обновување на енергијата и беше многу критичен кон новите правила.

„Ако некому му се допаѓа ова, тогаш не знае како изгледа вистинското тркање. Ова е како Марио Карт. Престигнуваш некого со 'засилување', потоа батеријата ти се празни и на следната кривина тој повторно те престигнува“, рече Верстапен.

Слично размислува и Алонсо од Астон Мартин, кој ја опиша новата сезона кратко и јасно: „Ова е шампионат на батерии“.

Новата генерација хибридни мотори во Формула 1 се базира на речиси еднаква распределба на моќноста помеѓу моторите со внатрешно согорување и електричната енергија.

Системот на дополнителна електрична моќност овозможува полесно престигнување, но ги остава возачите без енергија по нападот, па затоа тие често се изложени на брзо контра-престигнување.

Поради ова, повеќекратните промени на позициите се случуваат сè почесто на трките, што носи атрактивни дуели, но исто така го поставува прашањето дали таков систем ја менува самата суштина на возењето.

Шефот на Мерцедес, Тото Волф, верува дека публиката ужива во новиот формат.

„Видовме многу престигнувања. Во минатото имавме трки без ниту едно престигнување. Можеби понекогаш сме премногу носталгични за старите денови“, рече Волф.

Во наредните недели се очекува челниците на Формула 1 и ФИА да разговараат за можни измени на правилата за да се намали влијанието на батериите врз возењето.

Следната трка од Ф1 ќе се вози на познатата „Сузука“, а Големата награда на Јапонија е закажана за 29 март.