Верстапен ја напаѓа титулата: Да ми го кажеше ова некој пред два месеца, ќе мислев дека е идиот

По големата победа во Остин, Макс Верстапен се враќа во борбата за шампионската титула во Формула 1. Четирикратниот светски шампион сега е само 40 поени зад лидерот Оскар Пјастри, кој моментално поминува низ најтешкиот дел од сезоната, бидејќи разликата помеѓу возачите на Мекларен и Ред Бул беше 104 поени пред само четири трки!

Холанѓанецот победи на три од последните четири трки. Верстапен направи голема разлика во Италија, Азербејџан и Тексас, додека беше втор во Сингапур. Сега, со водството во шампионатот на дофат на рака, пет трки до крајот, има нова надеж во таборот на Ред Бул, а Холанѓанецот за прв пат сезонава гледа реална шанса повторно да го освои шампионатот.

„Шансата е тука!“, рече Верстапен ентузијастички по победата во Тексас и додаде: „Да ми го кажеше некој ова пред само два месеца, ќе мислев дека е идиот. Сепак, го подобривме билидот, подобро разбираме како функционираат работите и тоа е главната разлика“, рече Холанѓанецот.

Од друга страна, Мекларен признава дека конкуренцијата се засилила и дека работите треба да се нормализираат. Со само пет преостанати трки во шампионатот, Оскар Пјастри и неговиот тим ќе мора да најдат начин да се прилагодат на притисокот во последните фази од шампионатот.