Четирикратниот и актуелен шампион во Формула 1, Макс Верстапен, имаше разочарувачки викенд. Холанѓанецот ја мина целта на шестото место на Големата награда на Бахреин и по трката изјави дека веројатно извлекол максимум, со оглед на тоа што имал големи проблеми со сопирачките и гумите.
Во моментов, болидот на Ред Бул не изгледа како да може да им парира на најбрзите, особено на Мекларен, па затоа раководството на тимот е загрижено дека Верстапен би можел да бара нов тим.
Иако има договор до 2028 година, Daily Mail открива дека во него има клаузула која му дозволува да менува тим за време на летната пауза доколку заврши полошо од третото место во генералниот пласман кај возчаите.
„Многу сме загрижени, мораме да го подобриме болидот во блиска иднина за Макс да има болид со кој ќе може повторно да се бори за победи. Мораме да му доставиме болид што може да се бори за титулата. Се разбира, секој врвен возач има излезна клаузула во случај на лоши перформанси, но секогаш е различно. Да, тоа ќе биде тема ова лето“, рече советникот во тимот на Ред Бул, Хелмут Марко.
Верстапен по четири трки го држи третото место во генералниот пласман, осум бодови помалку од лидерот Ландо Норис, додека зад него со шест помалку на четвртото место е Џорџ Расел.
Како потенцијални нови дестинации на Верстапен се споменуваат Мерцедес и Астон Мартин, кои од следната сезона ќе соработуваат со Хонда, претходниот партнер на Ред Бул.
