Ако има награда за автогол на сезоната: Му покажа на пеналџијата како се шутира

Фудбалерите на Бенфика освоија само бод против Каза Пиа (2:2) синоќа во 11. коло од португалското првенство, а еден од главните виновници за тоа е дефанзивецот на лисабонскиот клуб, Тумаз Араужу.

Бенфика водеше со 2:0 со головите на Хеорхиј Судаков и Вангелис Павлидис, а во 65-тата минута беше досуден пенал за гостите.

Касиану ја зеде топката и шутираше, а голманот на Бенфика, Анатолиј Трубин, одлично одбрани. Но, она што Касиану не успеа да го направи, го направи соиграчот на Трубин, Араужу.

Дефанзивецот прв стигна до одбиената топка, а сите играчи на Бенфика очекуваа 23-годишниот Португалец да ја елиминира опасноста пред својот гол.

Сепак, во желбата да ја исчисти топката во корнер, тој ефектно заби во сопствениот гол.

Овој автогол влијаеше на психата на играчите на Бенфика, кои потоа примија гол во надополнувањето за конечни 2:2, па тимот на Жозе Мурињо сега заостанува 6 бодови зад лидерот Порто.

Табела: