Хулиан Алварес (26) го известил одборот на Атлетико Мадрид дека престанува да тренира со тимот. Аргентинскиот напаѓач ја донел одлуката откако вчера не успеал да разговара со тренерот Диего Симеоне за трансферот што го бара, објави Mundo Deportivo.
Алварес сè уште инсистира да оди во Барселона, желба што првпат јавно ја изрази за време на последното Светско првенство. Откако дознал дека во клубот го нема ниту тренерот, ниту извршниот директор Мигел Анхел Жил Марин, тој порачал повеќе да не сметаат на него.
Според информациите од шпанскиот весник, аргентинскиот напаѓач верува дека тренерот немал храброст да се соочи со него, иако Симеоне знаел дека Алварес сака да го реши својот статус. Играчот не очекувал Симеоне да оди на дводневен одмор на Ибица токму во моментот кога било објавено неговото враќање во клубот на разговори.
Алварес е подеднакво разочаран од однесувањето на Жил Марин, другото лице во клубот кое може да го одобри неговиот трансфер, кој исто така е на одмор. Играчот имал намера да ја реши ситуацијата мирно и преку дијалог, но не му била дадена можност за тоа.
Затоа, Алварес им даде јасна порака на присутните во центарот на клубот за неговите следни чекори. Неговите изјави беа кратки: „Не сметајте на мене“ и „Нема да тренирам повеќе“.
Се очекува напаѓачот да престане со тренинзите во среда, кога Симеоне ќе се врати од одмор и ќе го преземе тренингот. Во тој момент, аргентинскиот тренер повеќе нема да може да го одложи состанокот.
Алварес тврди дека од февруари има ветување од клубот дека ќе му овозможи продажба во летниот преоден рок. Сега тој донел конечна одлука и е решен да ги искористи сите опции за да обезбеди трансфер во Барселона.
