Американците без Кардосо на Мундијалот

На помалку од еден месец до почетокот на Светското првенство, тежок удар доби репрезентацијата на Соединетите Американски Држави. Американците заедно со Мексико и Канада се кодомаќини на Мундијалот од 11 јуни до 19 јули.

Имено, „Јенкиите“ ќе бидат значително ослабени на Светското првенство, бидејќи најголемото фудбалско натпреварување ќе го пропушти играчот на мадридски Атлетико, Џони Кардосо.

Кардосо го повреди глуждот, поради што ќе биде потребна операција, по што ќе следи пауза од околу два месеца, што значи дека играчот од средниот ред нема да биде подготвен за Мундијалот, објавија Американците и неговиот клуб Атлетико.

Последен настап му беше полуфиналниот реванш во Лигата на шампионите против Арсенал, а повредата ја заработил на тренинг.

Репрезентацијата на САД ќе го отвори своето Светско првенство на 13 јуни против Парагвај во Инглвуд, Калифорнија, додека во групата Д ќе игра и против Австралија и Турција.

Кардосо, кој има 24 години, има 23 настапи за репрезентацијата од своето деби во 2020 година.