Арсенал вечерва е домаќин на ПСЖ во првиот чин од спектаклот во Лигата на шампионите

Арсенал и Пари Сен-Жермен вечерва на стадионот „Емирејтс“ ќе го играат првиот натпревар од првото полуфинале во Лигата на шампионите.

Арсенал влегува во завршницата на елитното европско фудбалско натпреварување охрабрен од елиминацијата на Реал Мадрид на исклучително убедлив начин со вкупен резултат од 5:1.

Во англиското првенство не се истакнуваат многу во последно време и често киксираат, а последниот резултат беше нерешено дома против Кристал Палас. Нема сомнение дека мислите на Арсенал се насочени кон Лигата на шампионите и вечерва ќе го покажат своето вистинско лице.

Арсенал има многу проблеми со играчкиот кадар. Калафјори, Габриел, Габриел Жезус, Хаферц, Жоржињо и Томијасу нема да играат поради повреди, како и Парти поради жолти картони.

Од друга страна, ПСЖ стигна до полуфиналето со многу мака преку Астон Вила. По сигурната победа дома, во Англија имаа многу проблеми што ќе мора да ги решат вечерва. Веќе го освоија француското првенство, па можат целосно да се фокусираат на Лигата на шампионите. Инаку, ПСЖ нема проблеми со повреди и суспензии и сите играчи се на располагање.

Арсенал веќе го победи ПСЖ во лигашкиот дел од сезоната кога беше 2:0 за „Топчиите“, а двата ривала се сретнаа во групната фаза од Лигата на шампионите во 2016 година, ремизирајќи 1:1 и 2:2 во двата меча.

Натпреварот помеѓу Арсенал и ПСЖ ќе се игра вечерва од 21:00 часот со пренос во живо на Arena Premium 1.