Вардар повторно е приморан како домаќин да игра на тренинг центарот на ФФМ бидејќи атлетиката ќе ја окупира Националната арена „Тодор Проески“ претстојниов викенд.
Во рамките на 29. коло од 1.МФЛ екипата на Вардар ја пречекува Беса 1976 в сабота од 16 часот, но натпреварот ќе мора да го игра на алтернативен стадион. „Црвено-црните“ одбраа да играат на еден од стадионите на Тренинг центарот „Петар Милошевски“ на ФФМ во населбата Ново Лисиче.
По избореното куп финале во средата, Вардар им се враќа на лигашките обврски каде со досегашните 32 бода веќе сигурно чекори кон опстанок. За разлика од скопскиот колос, гостите од гостиварското село Добри Дол се претпоследни со 24 бодови и грчевито се борат да излезат од опасната зона.
Во сабота на Националната арена е отворањето на сезоната 2025 со меѓународен митинг во атлетика во организација на Атлетската федерација на Македонија. Тоа е причината зошто Вардар не може да го користи својот дом ова коло, откако и претходниот домашен натпревар, од 27. коло против Тиквеш, исто така го играше на ФФМ поради тоа што доамќин беше и Работнички, кој како подобропласиран на табелата доби предност да игра на Арената.
Рокадата на Вардар направи поместување и во локалната општинска лига на Кисела Вода каде в сабота од 17 часот исто така на ФФМ Слободен требаше да ја пречека Победа од Долно Лисиче, но сега тој меч е преместен за в недела во истото време, исто така на Тренинг центарот „Петар Милошевски“.
