Бламажа на летото: Борнмут со 10 подароци за Де Роси

Летните подготовки имаат за цел да ги откријат грешките на време, но има порази што не можат да се оправдаат со замор, комбиниран состав или необичен формат на натпреварот. Џеноа загуби од Борнмут со нереални 10:1, со што стана главен кандидат за епитетот најголемата бламажа на летото.

Екипата на Даниеле Де Роси го одигра својот втор и последен пријателски натпревар за време на престојот во Англија, а она што требаше да биде сериозен тест се претвори во катастрофа. Натпреварот се играше зад затворени врати на тренинг-центарот на Борнмут, а по договор меѓу двата клуба траеше 120 минути и беше поделен на четири получасовни периоди.

Овој факт мора да се нагласи, но дури и дополнителни 30 минути во споредба со стандарден натпревар не можат да ги направат десетте примени гола помалку болни.

Де Роси сакаше да им даде шанса на сите достапни играчи. Полустартната постава на Џеноа ги одигра првите 60 минути, прими 4 гола, од кои два од пенал. Единствениот гол за италијанскиот клуб го постигна исландскиот репрезентативец Микаел Егил Елертсон по асистенција од Лоренцо Коломбо.

Ако по првиот час сè уште можеше да се зборува за лоша игра против сериозен ривал од Премиер лигата, остатокот донесе целосен колапс. Џеноа ги играше вторите 60 минути со тим составен претежно од играчи на Примавера тимот, па Борнмут постигна уште 6 голови и заокружи неверојатни 10:1.

Борнмут минатата сезона заврши на шестото место во Премиер лигата и се квалификуваше за Лига Европа, па затоа квалитетот на англискиот клуб е неоспорен. Сепак, Џеноа е тим од Серија А и дури ни на нивниот младински тим не треба да му се дозволи толку лесно да прими 6 парчиња за еден час. Резултатот е уште поразочарувачки бидејќи ова беше првиот пораз за „Грифоните“ за време на летните подготовки.

Џеноа сега мора брзо да утврди колку од дебаклот е резултат на експериментирање, а колку е индикација за реални проблеми во тимот. Клубот разгледуваше неколку решенија за новата сезона во текот на летото.

Дебаклот доаѓа во време кога пазарот во Италија не мирува. За Џеноа, сепак, најважно сега не се вестите од трансфер пазарот, туку одговорот на теренот. Првата можност за такво нешто ќе дојде в сабота, кога тимот на Де Роси ќе одигра уште еден пријателски натпревар и тоа против Депортиво Ла Коруња.

Резултатот од тренинг-центарот на Борнмут нема да има никакво влијание врз табелата, но десетте примени гола сѐ уште 10 примени гола. Може да се зборува за 120 минути, многу млади играчи и силен противник, но резултатот 10:1 не се заборава лесно. Подготовките сè уште не се завршени, но срамот на летото ќе биде многу тешко да се избрише.