Македонската репрезентација во полн состав се подготвува за претстојните мундијалски квалификациски натпревари против Белгија и Казахстан. Напаѓачот на шкотски Ренџерс, Бојан Миовски, смета дека овие натпревари се едни од најважните во поновата репрезентативна историја.
„Знаеме против каква репрезентација играме. Веќе сме во последната фаза на квалификациите, а досега покажавме дека знаеме да играме фудбал и затоа се наоѓаме во ваква ситуација. Први сме моментално во групата, имаме гол-разлика 11:2. Ако некој нѐ запрашал претходно дали сакаме да се најдеме во ваква ситуација пред квалификациите, нормално дека бевме задоволни, но работата сѐ уште не е завршена. Знаеме дека не само овој, туку и последните два натпревара против Казахстан и против Велс се едни од најбитните во поновата репрезентативна историја“, вели Миовски.
„Првиот натпревар е против Белгија, а знаеме против каков противник играме. Свесни сме за нивните силни, но и слаби страни. Имаме доста поддршка од навивачите, знаеме дека ќе бидат во голем број, така што мислам дека ќе гледаат одличен фудбал. Белгија е одлична репрезентација, каде што 90% од играчите играат во топ петте лиги. Но, ние играме како тим, го докажавме тоа.“
Македонија гостува кај Белгија в петок од 20:45 часот во Гент, а потоа во понеделник го пречекува Казахстан во Скопје.
