Боливија преку Бразил на Анчелоти се избори за мундијалски бараж

Боливиската репрезентација е сѐ поблиску до враќање на Светските првенства, нешто што го чека од 1994 година, кога последен пат учествуваше на светскиот собир. Но, работата е до половина завршена бидејќи за да се случи тоа ќе треба да ги преживее интерконтиненталните бараж натпревари следната пролет.

За оваа пружена можност треба да му се заблагодари на стрелецот на единствениот гол на натпреварот, Мигелито, кој беше прецизен од белата точка во 4. минута од судиското надополнување на првото полувреме, но и на не толку заинтересираниот Бразил.

Повеќекратните светски шампиони веќе имаа обезбедено место на Мундијалот, па селекторот Карло Анчелоти ги измеша картите кога стануваше збор за составот, а резервистите му се заблагодарија за дадената можност со првиот пораз откако го напушти Реал Мадрид и седна на клупата на „Селесау“, по завршувањето на шпанското првенство.

Боливија само три пати има играно на Мундијалите и тоа на првиот во 1930 година во Уругвај, потоа во 1950 во Барзил и на гореспоменатиот во 1994 во САД каде го постигна првиот гол и го освои првиот бод.

Во интерконтиненталниот бараж ќе учествуваат 6 репрезентации, а покрај Боливија познат е и учесникот од зоната на Океанија и тоа Нова Каледонија. Азија ќе има еден претставник, исто толку и Африка, додека два претставника ќе има Северна Америка. Шесте репрезентации ќе бидат поделени во две групи каде полуфинале ќе играат послаборангираните, а победниците во финалниот бараж ќе играат против двете најдоброрангирани.

Аргентина исто така го загуби својот натпревар, во отсуство на нивната и светската легенда Лионел Меси, исто така без никакви последици, бидејќи „Албиселесте“ одамна обезбедија пласман на Мундијалот, каде што ја бранат титулата освоена во Катар. Аргентинците беа поразени со мининални 1:0 на гостувањето кај Еквадор.

На Боливија услуга ѝ направи и Колумбија која во голеада славеше на гости кај соседот Венецуела и тоа со 6:3. Венецуела со победа ќе отидеше во баражот без разлика на исходот од мечот Боливија - Бразил, но вака Венецуелците остануваа единствената јужноамериканска репрезентација која никогаш не играла на Мундијал. Иако поведоа уште во 3. минута, а потоа водеа и 2:1, Колумбијците не само што на двапати израмнуваа, туку потоа и направија пресврт со високи 2:5 за на крај да слават со 3:6.

Во останатите натпревари, кои не одлучуваа ништо, Парагвај славеше со 1:0 кај Перу, додека Чиле и Уругвај одиграа без голови.

Конечна табела: