Брутален напад на меч во САД: Го собори противникот, го шутираше, па му мавна 5 бокса

Брутален инцидент одбележа натпреварот по фудбал во средно училиште во Јужна Дакота помеѓу Брукингс Бобкетс и Рапид Сити Сентрал Коблерс.

Кон крајот на првото полувреме, кога Брукингс водеше со 2:0, избувна тепачка по еден дуел за топка крај аут-линијата. Џексон Бергман од Коблерс му се приближи на противничкиот играч Кајл Суст, го собори на земја, а потоа го шутна неколку пати додека лежеше на земја. Набрзо следеа серија тупаници, по што други играчи се придружија на инцидентот.

Тренерите и членовите на стручниот штаб истрчаа на теренот за да ги разделат играчите и да спречат понатамошна ескалација. Играчот кој го предизвика инцидентот доби црвен картон и ја напушти играта.

Натпреварот беше прекинат околу 10 минути поради хаос, но потоа продолжи. Инцидентот се случи на 4 минути пред полувремето. Брукингс Бобкетс успеаја да го одржат водството и на крајот победија со 2:0.

Снимката од инцидентот брзо се прошири на социјалните мрежи и предизвика бројни реакции во САД. Според извештаите на американските медиуми, тоа бил првиот натпревар во сезоната за двата тима.

За вакви физички напади обично следува доживотна суспензија за играчот насилник. Засега насилникот е казнет со еден натпревар суспензија, што е автоматска казна заради црвениот картон, но Yahoo Sport пренесува дека ќе мора да посетува курс по спортски дух и дека поголоема казна му се подготвува.

По повод инцидентот се огласи и клубот на насилникот:

„Рапид Сити Сентрал е свесен за инцидентот во кој учествуваше играч од нашата фудбалска програма и играчи од друг тим од Јужна Дакота за време на фудбалски натпревар. Очекуваме сите ученици да покажат почит, спортски дух и соодветно однесување во секое време, и на теренот и надвор од него. Не толерираме однесување кое не ги исполнува овие очекувања. Ќе бидат преземени соодветни мерки во согласност со политиките и процедурите на RCAS“, соопшти Рапид Сити Сентрал.