Челси се пласираше во полуфиналето на Светското клупско првенство откако ноќеска го победи Палмејрас со 2:1.
Англискиот клуб поведе во 16-тата минута кога ѕвездата Кол Палмер го матираше Вевертон по асистенција од Тревор Чалоба, а Палмејрас израмни на почетокот на второто полувреме, кога стрелец на гол од речиси мртов агол беше Естевау, млад фудбалер кој за неколку дена официјално ќе стане нов играч на Челси.
На самиот крај од натпреварот, Мало Густо се обиде да ја уфрли топката во шеснаесетникот, но голманот на Палмејрас, Вевертон, реагираше катастрофално и ја сврте топката во сопствената мрежа.
Челси ќе игра против друг бразилски гигант, Флуминенси, во полуфиналето на 8 јули. Тимот од Рио синоќа со 2:1 го совлада изненадувањето Ал Хилал.
Другиот полуфинален пар ќе бидат победниците од денешните четвртфинални натпревари ПСЖ - Баерн (18:00 часот) и Реал Мадрид - Борусија Дортмунд (22:00).
