Чесите бесни поради срамот на векот: Изгубивме од рибари и столари

Репрезентација на Чешка синоќа го доживеа најголемиот срам во својата историја откако беше поразена со 2:1 од Фарските Острови.

Фарските Острови славеа на домашен терен во Торсхавн со головите на Ханус Серенсен и Мартин Агнарсон, додека единствениот гол за Чесите беше дело на Адам Карабец кога во 78. минута израмни на 1:1.

Сои овој пораз Чешка ги загуби и оние минимални шанси да го освои првото место, за кое се бореше со Хрватска, а чешките медиуми остро ја критикуваа својата репрезентација.

По поразот од земја со население од 55.000 жители, водечкиот чешки портал Idnes.cz го нарече поразот „најголемиот срам на чешкиот фудбал од независноста“, додека други употребија термини како „дебакл“ и „историски срам“.

Порталот Sport.cz беше уште поостар, опишувајќи го настапот на чешката репрезентација како „безнадежен и без никаква идеја“.

Нагласија дека Чешка загубила од репрезентација на полупрофесионални играчи, истакнувајќи дека за Фарски Острови играат фудбалери кои вообичаено работат како рибари и столари.

За да биде уште полошо, Чешка успеа да упати само еден удар кон голот на синоќешниот натпревар.

За Фарските Острови, кои некогаш беа рангирани на 198. место на ранг-листата на ФИФА, ова беше нивната четврта победа во последните пет квалификациски натпревари, нивната најуспешна серија во нивната историја. Никогаш претходно не победиле повеќе од двапати во едни квалификации. Во четвртокот Фарските Острови ја средија и Црна Гора и тоа со високи 4:0, исто така на домашен терен. Претходно двапати го победија Гибралтар.

Победата ги става во борба за бараж, каде што ќе бараат место пред Чешка, која има еден бод предност со уште еден преостанат натпревар. Сепак, шансите тоа да се случи се мали бидејќи Фарските Острови треба да играта уште само со Хрватска, додека Чесите со Гибралтар.