Хрватска ќе го одигра натпреварот од Лигата на нации против Англија во Риека (утре во 18:00 часот) без своите навивачи поради санкција од УЕФА, но сепак стадионот „Рујевица“ нема да биде празен. Се очекува присуство на меѓу 5.000 и 6.000 деца од училишта и фудбалски академии од цела Хрватска. Со капацитет од 8.279 места, стадионот би можело да биде пополнет до речиси три четвртини од својот капацитет, според англиските медиуми, кои ја опишуваат ситуацијата како искористување на правна „дупка“ во прописите на УЕФА.
Според правилата на европското фудбалско тело, натпреварите што се играат пред празни трибини дозволуваат бесплатен влез за деца на возраст до 14 години од училишта и фудбалски академии, под услов да се придружувани од соодветен број возрасни лица.
УЕФА првично предвидуваше околу 3.000 деца, но Хрватска потврди дека таа бројка би можела да биде речиси двојно поголема. Децата ќе пристигнат од фудбалски школи од целата земја. Едно возрасно лице – тренер или наставник – ќе смее да придружува група од 15 деца.
Првично, на навивачите на ниту една од двете репрезентации не им беше дозволено да присуствуваат на натпреварот; сепак, по разговорите меѓу Англиската фудбалска асоцијација и УЕФА, на англиските навивачи им беа доделени 100 бесплатни билети.
Хрватска го игра натпреварот против Англија без своите редовни навивачи поради казна изречена по инцидентите за време на четвртфиналниот натпревар од Лигата на нации против Франција во март 2025 година.
Хрватскиот фудбалски сојуз беше казнет по првиот четвртфинален натпревар одигран во Сплит. Дисциплинска постапка поради расизам и дискриминација беше покрената по тој натпревар – како и по натпреварот во Париз меѓу Франција и Хрватска – што резултираше со единствена дисциплинска одлука: Хрватскиот фудбалски сојуз беше санкциониран со играње на следниот домашен натпревар пред празни трибини, а за наредниот натпревар на гостински терен му беше забрането да продава билети за хрватските навивачи.
Сè на сè, Хрватскиот фудбалски сојуз беше казнет поради однесувањето на навивачите за време на тие натпревари со парична казна од 93.000 евра, еден домашен натпревар без публика, еден гостински натпревар без присуство на гостински навивачи, како и со обврска да му исплати финансиска отштета на Францускиот фудбалски сојуз за штетата предизвикана на стадионот во Париз.
