Селекторот на шпанската репрезентација, Луис де ла Фуенте, изјави дека новиот фудбалер на Барселона, Родри, е најдобриот играч во светот на својата позиција.
Летово Родри (30) го освои Светското првенство со Шпанија и беше прогласен за најдобар играч на Мундијалот.
„Родри е Меси на шпанскиот фудбал. Верувам дека ќе се прилагоди на секоја ситуација, бидејќи е најдобар во светот на својата позиција. Воодушевен сум што овие одлични фудбалери се во Ла Лига, бидејќи тоа ја прави уште подобра“, рече Де ла Фуенте во интервју за Radio Marca.
Родри пред две недели пристигна во Барселона од Манчестер Сити.
„Ова значи дека најдобрите играчи во светот, имено нашите фудбалери, се натпреваруваат тука, во шпанските клубови. Би сакал другите играчи штоиграат во странство да се вратат и да го покажат својот талент во шпанскиот фудбал“, додаде Де ла Фуенте.
Меси во понеделникот објави дека ја завршил својата кариера во репрезентацијата на Аргентина.
„Тој е легендарна фигура во фудбалот. Сè уште не сме го сфатиле значењето на неговата фудбалска величина и ќе биде многу тешко за некого да ги надмине бројките што ги постигна. Ќе се пензионира од фудбалот кога ќе одлучи. Мислам дека сè уште не е на пат да се пензионира и неговата клупска кариера ќе трае долго“, рече Де ла Фуенте.
Де ла Фуенте (65) ја презеде шпанската репрезентација во 2022 година. Наредната година ја освои Лигата на нации, па Европското првенство во 2024 и Светското првенство оваа година.
„Нашата отежнувачка околност е што немаме многу време. Немаме 38 кола, па дури ни 10, за да ги промениме работите како што прават во клупскиот фудбал. Затоа е клучно да изградиме солидна група. Единствениот мотив што го имам кога донесувам одлука да повикам играчи е спортскиот. Немам други мотиви“, рече селекторот на Шпанија.
Де ла Фуенте не сакаше да зборува за долгорочните планови.
„Веднаш по освојувањето на Светското првенство, додека играчите сè уште ја славеа титулата, некои од нив ме прашаа што им преостанува да освојат. Мојот непосреден одговор беше: 'Засега, имаме натпревар против Англија во септември'. Ќе се обидеме да подобриме сè, бидејќи секогаш има простор за подобрување. Следното натпреварување ќе бара различни работи и ќе биде исклучително тешко. Ќе мора да покажеме ново лице, нова верзија“, заклучи Де ла Фуенте.
