Џеноа ќе го назначи Даниеле Де Роси за нов тренер, објавија денеска италијанските медиуми.
Football Italia објави дека Де Роси ќе потпише договор до крајот на сезоната, со опција за продолжување на соработката доколку тимот избори опстанок во Серија А.
Де Роси ќе го предводи тимот во претстојниот првенствен натпревар в недела против Фиорентина.
Управата на клубот не сакаше да го одложи назначувањето на новиот тренер, туку да го ангажира пред паузата во првенството. Водеше разговори и со Паоло Ваноли.
Исто така, раководството реагираше брзо бидејќи очекуваше Де Роси да добие понуда од друг клуб, а се поврзуваше токму со Фиорентина по отказот на Стефано Пиоли.
Џеноа го отпушти тренерот Патрик Виера на 1 ноември откако тимот не победи на ниту еден натпревар во првите девет кола од Серија А.
Оттогаш, на по еден меч тимот го предводеа Роберто Мурџита и Доменико Кришито, а во понеделникот „Грифоните“ ја остварија својата прва победа во лигата совладувајќи го Сасуоло со 2:1 и се искачија на 18-тото место на табелата со 6 бодови.
